الخلطة السحرية لمنع تساقط الشعر ديال غزلان مكوار مجربة

13/2/2014

وصفة علاج تساقط الشعر

اخواتي الغاليات جيت نشارككوم بتجربتي للخلطة الجميلة ديال غزلان مكوار وصفة علاج تساقط الشعر لي قدمات فصباحيات دوزيم وبالصور طبعا هاد الخلطة دلاتني عليها الغالية "المدام" دعيو معاها بتيسير الامور ولو في قلوبكوم.
 
وجربتها 6 مرات ومزال عندي غنبقا مداومة عليها ان شاء الله حيت ماشي غير كتمنع التساقط لكن عندها مزايا كثيرة وربي على ماأقول شهيد.
 
نعطيكوم المقادير والطريقة ولي جرباتها وعجباتها النتيجة تدعي معايا ومعا غزلان مكوار ومعا المدام راه الملائكة غتقول ليكوم بالمثل هادي عمركوم تنساوها .
 
علي بركة الله :
 
الثومة+البصلة حمرا + السانوج + الزعتر + سكنجبير طري ( انا مكانش عندي درتو غبرة ) + اليزير والخزامى + زيت الزيتون ( إكسترا ڤييغج) + وزيت الخروع.
 
مولات الوصفة قالت نديرو حفنة من كل حاجة وملعقة كبيرة من السانوج لكن انا درت ملعقة كبيرة غير باش نجرب وناوية نعاودها ان شاء الله ديما.

وصفة علاج تساقط الشعر
لي بغات تستعمل هاد الوصفة فنفس اليوم غتخلط المقادير وديرهوم فحمام مائي ولي مازرباناش بهم تخلطهوم فقرعة وتخزنها فمكان مظلم مدة عشرين يوم.
 
انا درتها فحمام مائي وكل مرة كنبغي نستعملها كنحرك القرعة مزيان ونصفي الزيت لي يقدني فشعري ونشق به شعري مزيآن الفروة والزغبة وكنخليها 4 ساعات وكنغسل شعري عادي.

وصفة علاج تساقط الشعر

وصفة علاج تساقط الشعر
غزلان مكوار ڭالت ان هاد الزيت كينشف الشعر لكن انا منشفوش ليا بالعكس اصلح ليا بزاف ديال العيوب :
 
ولات الزغبة عندي غليضة تبارك الله + واللمعان من اول استعمال + مابقاش شعري مشووك + ومانعاودش ليكوم على الرطوبية لي فيه غير سايح وخاص لي يجمعو هههه.
ضحكو عليا انا ڭلت غير داكشي لي كاين.

 

Category : SOINS DES CHEVEAUX العناية بالشعر | Write a comment | Print

Comments